ستران عەبدوڵڵا 02:11 PM - 2026/06/25

ستران عەبدوڵڵا 
رۆژی ١٧-٥-٢٠١٦ یەکێتیی نیشتمانی کوردستان و بزووتنەوەی  گۆڕان رێککەوتنی دەباشانیان  ئیمزا کرد. بەم رێککەوتنە ژمارەی کورسییەکانی یەکێتیی و گۆڕان لە پەرلەمانی کوردستان بووە ٤٢ کورسی ( ١٨ی یەکێتیی و ٢٤ گۆڕان) هی پارتی ٣٨ بوو .
ئەو کاتە سەرۆک مام جەلال و کاک نەوشیروان لە ژیاندا بوون و کۆمەڵانی خەڵکیش شایەتی مەراسیمی رێککەوتنەکە بوون . پێش ئەوەی فراکسیۆنی دەباشان بڵێ ئەم کورسیانە چی لێ دەکات؟ بەکاری دێنێ بۆ دیموکراسیی و ئاشتی  یان بۆ گەلەکۆمەکێی سیاسیی یان تەنانەت دەیشکێننێ و دەیسوتێنێ ، رێک پارتی رایگەیاند بە جیا لەگەڵ  یەکێتیی و بە جیا لەگەڵ گۆڕان  دادەنیشێ ، بەڵام پێکەوە لەگەڵیان کۆنابێتەوە. ئەمە لە قوتووی کام  سیاسەت و دیموکراسیدا جێی دەبۆوە؟
ئەمساڵیش یەکێتیی و نەوەی نوێ رێککەوتنێکیان راگەیاند کە ماوەیەکی تر بە رەسمی ئیمزای دەکەن. رێکەوتنی دەباشان وەک ئەوەی  یەکێتیی و نەوەی نوێ وتیان دژی پارتی نین،  بەڵام بە هەقی خۆمانی  دەزانین سیاسەت بکەین و پێکەوە بین.
بەس بە کێ دەڵێی ؟ پارتییەک لێپرسراوی هەڵبژاردنەکەی لەسەر شاشە جەمع و تەرحی کورسییەکانی سەهوو و هەڵەی تیایە و حیساباتەکەی دەبێتە ترندی سۆشیال میدیا  چۆن دان بە کورسی کۆکراوەی هاوپەیمانییەکاندا دەنێت و چۆنی دەژمێرێت؟
جاری پێشوو پارتی بەوپەڕی دیموکراسیی و رێزگرتن لە دامەزراوەی تەشریعییەوە  سەرۆکی پەرلەمانی ئاوارەی ئەو دیو دێگەڵە کرد و خۆی لە پێشهاتەکانی رێککەوتن نەبان کرد. 
ئەمجارەش لە رێککەوتنی یەکێتی و نەوەی نوێ کە ژمارەی ٣٩ کورسی مسۆگەر کردووە، دیسانەوە پەڵپ بە دیموکراسی ئەگرێ و  بیانووی ناڕەوا بۆ جولەی سیاسیی بەرامبەرەکانی دەهێنێتەوە. بەناوی پیرۆزی و هەیبەتی پەرلەمانەوە  تۆمەتی سەیر و سەمەرە بۆ ململانێکارانی بەرامبەری دادەتاشێ.
ئەمەی پارتی دەیکا و دەیڵێ ناچێتە بابەتی شەرعیەت و دیموکراسی راستەقینەوە، ناچێتە کۆڕی سیاسەتی مەنتیقییەوە ، دەچێتە بابی کۆمیدیای سیاسیی خۆسەپێنییەوە