چوارچێوەی هەماهەنگی لە 295مین كۆبوونەوەی خۆی بە ئامادەبوونی عەلی فالح زەیدی، سەرۆك وەزیرانی عیراق، لە نووسینگەی عەبدولحوسێن مووسەوی دوایین پێشهاتە نیشتمانی و ناوچەیییەكانیان تاوتوێكرد.

بەپێی راگەیەندراوێكی چوارچێوەی هەماهەنگی، ئامادەبووان جەختیان لە گرنگیی پەلەكردن لە یەكلاییكردنەوەی پۆستە بەتاڵەكان كردەوە لەسەر بنەمای لێهاتوویی و دەستپاكی، تا هەماهەنگی لە نێوان وەزارەتەكان بەهێزتر بێت و دامەزراوەكانی دەوڵەت بە شێوەیەكی رێكخراو كارەكانیان بكەن.

هەروەها، ئەندامانی چوارچێوەكە گوێیان لە وتارێكی سەرۆكوەزیرانی عیراق گرت سەبارەت بە ئەنجام و دەستكەوتەكانی سەردانەكەی بۆ چەند وڵاتێكی ئەورووپی و ئامادەبووان دەستخۆشییان لەو هەوڵانە كرد كە ئامانجیان بەهێزكردنی پەیوەندییە نێودەوڵەتییەكانی عیراق و كێشكردنی وەبەرهێنانە بۆ وڵاتەكە.

تەوەرێكی تری كۆبوونەوەكە، ئامادەكارییەكان بوو بۆ سەردانی چاوەڕوانكراوی سەرۆكوەزیران بۆ نیویۆرك بە مەبەستی بەشداریكردن لە كۆمەڵەی گشتیی نەتەوە یەكگرتووەكان. جەخت كرایەوە كە پێویستە پەیامی عیراق لەبارەی پاراستنی سەروەریی خاك و رەتكردنەوەی دەستوەردانی دەرەكی بگاتە لووتكەی ناوەندە نێودەوڵەتییەكان. 

لە كۆتایی كۆبوونەوەكەدا، هێزەكانی ناو چوارچێوەی هەماهەنگی جەختیان لە یەكڕیزی و پتەوی خۆیان كردەوە و پاڵپشتیی تەواوی خۆیان بۆ حكومەت و جێبەجێكردنی كارنامە وەزارییەكە دووپات كردەوە.