تۆڕێكی 11 كەسی لە بابل دەستگیر كران كە هەستابون بە ساختەكردنی مامەڵەی وەرگرتنی قەرز و پێشینە لە لقی بانكی خانووبەرە و زیانیان بە سامانی گشتی گەیاندووە.
دەستەی دەستپاكی عیراق لە راگەیەندراوێكدا بڵاویكردەوە، تۆڕێكی 11 كەسیان دەستگر كردووە ، بە تۆمەتی ساختەكردنی مامەڵەی وەرگرتنی قەرز و پێشینە لە لقی بانكی خانووبەرە لە بابل،  بەپێی راگەیەندراوی دەستەكە،تۆڕەكە لە شەش فەرمانبەری بانكەكە و پێنج هاووڵاتی پێكهاتوون كە مامەڵەی پێشینەی خانووبەرەیان ساختە كردووە و دەستكاریكردنەكە لە 56 مامەڵەدا كراوە و هەندێك زانیاریی فرۆشتن و گەڕاندنەوەی پێشینەش ساختەكارییان تێدا كراوە.

دەستەی دەستپاكی ئاماژەی بەوەشكردووە،رێكارە یاساییەكان بەرامبەر تۆمەتبارەكانی تریش بەردەوامە و ئەوانیش بە بڕیاری دادگا دەستگیر دەكرێن و لە ئۆپراسیۆنەكەشدا دەست بەسەر مامەڵە، كارتی دانەوەی قەرز و مۆری بانكەكە لەگەڵ پارە و خشڵ و زێڕدا گیراوە و تۆمەتبارەكان بە بڕی زیاتر لە 543 ملیۆن دینار زیانیان بە سامانی گشتیی عیراق گەیاندووە و بە بڕیاری دادگا مامەڵەكردن بەو دۆسیانەوە بە تەواوی وەستێنراوە.

ئاشكراكردنی ئەم تۆڕە ساختەكارەی لقی بانكی خانووبەرەی پارێزگای بابل لەلایەن دەستەی دەستپاكیی عیراقەوە، دوای كۆكردنەوەی زانیاری و وردبینی لە مامەڵەكانی وەرگرتنی پێشینەدا هات، كە تێیدا فەرمانبەرانی بانكەكە بە هاوكاریی كەسانی دەرەوەی دەزگاكە دەستكاریی بەڵگەنامە رەسمییەكانیان كردبوو تا بە شێوەیەكی نایاسایی دەست بەسەر پارەی گشتیدا بگرن.